NOSEY DREIG WEER MET STAKING
Indien die Regering nie op die herdenking van die “plaaswerker-revolusie” by sy beloftes hou oor die transformasie vir plaaswerkers nie, sal weer gestaak word. Die “spertyd” is die herdenking van die gewelddadige stakings op 1 November 2012.
Só het mnr. Nosey Pieterse, voorsitter van Bawsi, aan Landbouweekblad gesê.
Dié organisasie en die ANC het Sondag, 26 Oktober, ‘n massavergadering in De Doorns, waar die plaaswerkeropstande twee jaar gelede plaasgevind het, gehou.
Hoewel die minimum loon ná dié stakings verhoog is en nou op R111,72 per dag vir ’n werksdag van nege uur staan, word ‘n minimum loon van R150 per dag steeds gevra.
Luidens ‘n strooibiljet oor die vergadering wat Bawsi aan Landbouweekblad verskaf het, is groot oorwinnings behaal met die stakings. Werkers het 52% verhoging gekry en die organisering in vakbonde het met rasse skrede gegroei. “Maar boere doen alles in hulle vermoë om hierdie oorwinnings wat met bloed, sweet en trane bekom was, te neutraliseer.
“Een van die dinge wat boere gedoen het, was om die krediet-doktersbrief wat aan plaaswerkers verskaf was, indien hulle ‘n dokter benodig het, af te skaf.” ‘n Dokterskonsultasie is R220 per besoek. ‘n Daghospitaal word nou ge-eis. Ander kwessies wat Sondag bespreek sou word, sluit in ‘n moratorium op uitsettings en geen aftrekkings vir huur- en vervoergeld nie.
Kom daar weer ‘n grootskaalse plaaswerkerstaking? Pieterse het gesê indien die Regering en boere op die middag van 1 November, wanneer die herdenking van die geweldadige plaaswerkerstakings plaasvind, nie hul beloftes nakom nie, sal weer gestaak word.
Die voormalige adj.pres. Kgalema Motlanthe en ander belanghebbende ministers het verlede jaar twee keer met boere en plaaswerkers in die provinsie vergader ná die gewelddadige plaaswerkerstakings.
Die voormalige Wes-Kaapse Minister van Landbou en Landelike Ontwikkeling, mnr. Gerrit van Rensburg, het later gesê die resultaat van die Regering se dialoogsessies in die Paarl en De Doorns was niks anders as “pure wind” nie. “Daar is geen planne, geen begrotings of selfs notas van die vergaderings nie. As die vergaderings nie plaasgevind het nie, sou niks anders gewees het nie.”
Die DA het ook strooibiljette in antwoord op dié van Bawsi en die ANC, uitgedeel.
Dr. Ivan Meyer, Wes-Kaapse leier van die DA, het daarin uitgewys dat daar reeds beplan is om die kliniek in ‘n dagsentrum vir die gemeenskap te omskep. ‘n Nuwe ambulansstasie, waarvandaan nood-mediese dienste uitgestuur word, word ook gebou.
Hy het Pieterse gevra om by die belofte te hou wat hy by die Wes-Kaapse grondhervormingsberaad op 25 Junie gemaak het om die politiek op ys te plaas sodat saamgewerk kan word om ‘n beter lewe vir mense te bou.
“Met die oesseisoen om die draai, gaan die landbousektor baie werk skep en ook groei. Ek smeek jou om nie hierdie geleentheid op te mors deur weer politieke speletjies in ons plaasgebiede, soos in 2012, te speel nie,” het Meyer gesê.
* Lees die twee instansies se pamflette hieronder.
DA Open Letter
BAWUSA